Conradh nua Comhléiriúcháin Chlosamhairc idir Éire agus Ceanada ag teacht i bhfeidhm - an tAire Humphreys
D’fhógair an tAire Ealaíon, Oidhreachta agus Gaeltachta, Heather Humphreys, inniu (Dé Máirt) go bhfuil an conradh nua Comhléiriúcháin Chlosamhairc idir Éire agus Ceanada i bhfeidhm anois. Gabhann sé ionad Chonradh Comhléiriúcháin 1989 agus déantar socruithe maidir le scannáin, drámaí teilifíse agus cláir faisnéise comhléirithe ag comhlachtaí léiriúcháin na hÉireann agus Cheanada a uasghrádú agus a fheabhsú go suntasach leis.
Cuideoidh an Conradh nua aitheantas a thabhairt ar oibreacha closamhairc mar oibreacha Éireannacha agus Cheanadacha, ag ligean do na scannánóirí rochtain a fháil ar na tacaí airgeadais agus buntáistí éagsúla i ngach críoch. Tugtar athruithe isteach leis freisin i dtaca leis na híosleibhéil ranníocaíochta airgeadais ó gach páirtí comhléiriúcháin agus na socruithe i ngeall leis an rannpháirtíocht cruthaitheach a éilítear ó gach críoch. Leis sin éascófar comhoibriú níos fearr fós idir na comhlachtaí léiriúcháin in Éirinn agus i gCeanada sa todhchaí.
Dúirt an tAire Ealaíon, Oidhreachta agus Gaeltachta, Heather Humphreys:
“Is céim dhearfach eile chun tosaigh é an Conradh Comhléiriúcháin seo d’earnáil scannán agus teilifíse na hÉireann. Tá comhléiriúcháin ag éirí níos coitianta anois agus tá conarthaí ar nós an ceann seo an-tábhachtach chun léiriúcháin idirnáisiúnta scannán a chumasú. Tá traidisiún láidir comhléiriúcháin ag Éirinn agus Ceanada cheana. Le deich mbliana anuas, rinneadh níos mó ná 30 scannán agus dráma teilifíse a léiriú faoi Chonradh 1989. Tá súil agam go n-eascróidh tuilleadh comhléiriúchán dár n-earnáil chlosamhairc as an gConradh nuashonraithe seo.
Bhí an méid seo a leanas le rá ag James Hickey, POF Bhord Scannán na hÉireann:
“Cuireann Bord Scannán na hÉireann fearadh na fáilte roimh an gConradh Comhléiriúcháin seo le Ceanada. Tá caidreamh an-láidir comhléiriúcháin scannán agus teilifíse ag Éirinn le Ceanada cheana féin. Nuair a thagann an Conradh nua i bhfeidhm beidh deiseanna ann do fiú níos mó comhoibrithe idir an dá thír. Is tráthúil é síniú an Chonartha nua. Ba chomhléiriúcháin faoin gConradh roimhe seo, a fuair tacaíocht ó Bhord Scannán na hÉireann agus Telefilm Canada, iad na scannáin ‘Brooklyn’ agus ‘Room’, a ainmníodh do na Gradaim Academy. Is comhléiriú le Ceanada freisin é an scannán nua beochana, ‘The Breadwinner’, ón stiúideo a ainmníodh do na Gradaim Academy, Cartoon Saloon. Táimid anois ag tnúth le leanúint le treisiú na gcaidreamh sin sa todhchaí faoin gConradh nua.”
CRÍOCH
